L'agonia di Faito (di Antonio Cavallaro)

Sona triste ‘a campana ‘e San Michele,
cchiù ca nu suono, pare nu lamiento.
Song’arse ll’arbere, comm’a cannele,
senza speranza. Cu nu sciuscio ‘e viento.

‘O mostro te cunzuma a ppoco a ppoco,
si addiventato na bolgia infernale,
te sta astrignènno dint’’e llengue ‘e fuoco
Faito mio. Te sta facènno male!

Niente nce hanno pututo sti guagliune,
ca chine ‘e vuluntà, cu ‘o ffuoco attuorno,
muorte ‘e fatica, nire comm’’e ggravune,
hann’avut’a cumbattere. Notte e ghiuorno.

Era na gioia, sagliènno p’’e turnante,
addò fin’a mare ‘o sguardo se perde,
guardà chelli ffilere nove ‘e piante,
tutt’’o crinale ammantato ‘e verde.

Mo, a te vedé accussì, muntagna mia,
nun è dispiacere, è nu dulore,
na sofferenza, na malincunìa,
comm’a spade appizzàte dint’’o core!

Chello ca Dio nce aveva rialàto,
‘a mano ‘e ll’ommo ‘n’ha avuto pietà.
Ire indifesa e t’hanno violentato.
Nun te puo’ ffà n’ata verginità!